كيفاش قتلي مالا بابا.... يا خسارة الحكاية الصحيحة في الوقت الغالط... خلينا صحاب توا مدام فما اساس نرجعو نبنيو عليه حكاية جديدة...بجدك ولا تفدلك ...عود عمر منڨالتك يا كبدي منوهكا قبل متدخل عشقات و هات منعاودوش من جديد مرة اخرى في وقت اخر العوادة في الدقيق الاحرش.
و شد عندك شوية حاجات تعمر بيهم منڨالتك ...الحكايات الصحاح يكونو صحاح على جميع الاصعدة في الوقت الصحيح و المكآن الصحيح و مع العباد الصحاح اما انصاف الهداري ...الحكايات ...الروايات و العشقات عمرهم مكانو صحاح ...اصلا العشقات الكبار يا يوصلوك للموت يا معملنا شي مفماش وسط تاقف فيهم و تعلل ولا بلايص وسط تستنى فيهم الحكايات الصحاح اصلا قلبي ماهوش محطة كيران تظلل تحتها لين تجيك الكار الصحيحة.
و منغير متذبلهم عينيك و منغير متقعد تعلّلي علاش و كيفاش و تعتذر و تتاسف و احلف و تتكتف ...اليمين والغربة ياسر لوح عليك. خليه عندك كلامك بلو و اشرب ماه مازلت باش تستحقو ياسر على الدزة هذي.
اما انا اش تحبني نعمل بربي نشد تصويرتك و نقعد نسب في الزمان ولا ناقف تحت بلكون دارك و نتلبد نشمم ريحتك و نتخيل خيالك ولا نشد المخدة في الليل و نلعبها الوسادة الخالية و نبات نغرد و نقوم الصباح عنيا محوقين تقولش دب الباندا الاليف..ندهن بالاسف متاع جنابك وقتها باش منفجعش الناس باكا المنظر...الاسف متاعك يا كبدي لاهو باش يرقعلي العمر الي ضاع جرتك ولا يبري الوجيعة..مناش في فلم خمسيني ..وقتنا للاسف الفيني
تتفكر على جدة مبدينا كنت يجيني شايخ عينيك يبرقو و كنت نشوف روحي متربعة فيهم ...كنت تحكي بالسوايع منعرش منين تخلقو الكلامو تتوحش القعدة وقت يوفى فنجان القهوة...كل يوم تكلمني تقلي لازم نقابلك اكيد عندي تقريبا حتى موضوع ولازم نبتّو فيهم.
كنت في ضهكتك و دمعاتك،كنت في هدرتك و همساتك،كنت الطفلة الصغيرة الي في رموش عنيك متشعبطة ..الدرويشة الي بحة همساتك تشبعني ...كنت ساكني بالطول و بالعرض و كنت نحس بينا سحاب ناعم معجون ب نوتات موسيقى و كلام كالريش...كان بينا اشجار الحان و اغاني و انغام...مخازن طيور مهاجرة استقرت في دفا بيناتنا...كان فما بيناتنا حاجات تتنفس و تعيش.
و اليوم هاك مقابلني تترشف في قهوة باردة و تتلكون و تقول في كلام ميت و انا مركزة مع عينيك نشوف في الخواء في عينيك...جاي تقلي الوقت و ما الوقت ...وقتاش قتلتني فيك؟
بغض الجرح و الضروف و الاوضاع و شكون مقصر في حق شكون...الرصاص الي قاعد تضرب فيه عليا قاعد ينقبلك في كنينك و ماكش فايق ...كي الحرق يوجعك كي يبرد قداه باش نكويك ...قداه باش نعيش فيك ..كالجمرة في كنينك باش نكويك....قداه باش نطيح فيك كالولية الصالحة باش ندڨك و نكويك.
انا تو نصبر و نقول ميسالش تو توجعني و نبرى و هو الصبر متسمي على الرجال و موش لينا ماهو ياما نساء عضّو على قلوبهم و ما انهارو و لو دخل المحيط جرحهم ما يساعو و في عز الخنقة ضحكو على باعو.
كملت قهوتك و خلصت...انت مشيت و انا قعدت...فما خيط موسيقى حزيييين طالع من بلاصتك وين كنت قاعد...و انا نراجع في الفلم في مخي و نعاود و متلكمتة على روحي في عز الصيف قاتلني البرد...
هبة الدحداح

المحبة هي القهوة و القهوة هي المحبة...
كي ززوة القهوة العربي نطيّب فيك في قلبي سلّة سلّة؛ تفوح في تراكن الروح ريحتها البنينة و نتشوق نصبها في فنجان و تقعد في البلكون و نتبننها اما لازمني نستناها حتى تفور ...نفس البرانسيب في المحبة ؛ المحبة هي القهوة و القهوة هي المحبة...
معينيش نقول حوارات الافلام ، كليشيهات العشاق ماهي الا كلام ؛ انا محبتي ليك بطعم القهوة كحلة و سكرية .
و نستناك كل صبحية تتعدى في راس النهج ، نستنى نشوفك و تشرق عليا الشمس متاع الثمنية و نص ، نتشوق نشم ريحة الياسمين الي يفوح و يعبي الزنقة كيف تتعدى من بعيد منظم مظموم كي مشموم الفل ترد فيا الروح .
و تسرق الخزرة و تذبلي عينيك من تحت لتحت و نعمل روحي مريت شي و نخزرلك و نثبت فيك اما متفيقش بيا نطير بيك انا نفيق بيك و مترانيش حتى نهار الي تفور قهوتك باش نعمل روحي مفيباليش تقولش موش انا الي حطيت ززوتك على ناري و عسيت عليك حتى عقدت و جيت.
نبات و نصبح نحلم بخزرتك الي على جنب و اكا الضحكة ...ياميييييمتي انا السر و الكمون لكلو في هاكي الضحكة؛ ريت هاك مفيبالكش بعمايل ضحكتك فيّا و شنوة تاثيرها علياّ تي هاكي هدية ربي لياّ..
كنت منعرفكش؛ تقعد جنبي و منتلفتكش ...و انا نهار منتفكرش تبسمت جنبي و على تلفيتي ضحكت وين كنت عاد انا ساعتها مشييييت فيها و ما رجعت.
كنت مسكرة على قلبي بالف قفل و مفتاح و كل مفتاح ملوح في بحر مالبحورات..و هكاكا منغير مقدمات،تفضلت حضرتك و تكرمت و ضحكت و جاتني صدقة من فمك القرناط ، بعد ما قعدت جنبك في الكار بالشهورات و مصبحت عليا حتى صباح مالصباحات،و عطات الدنيا الخيرات.
طلعت الشمس الي كانت غايبة من زمان و فتّح زهر الاقحوان والكار الصفرا ولات ملونة كي قوس قزح الوان الوان و حسيت قلبي روى لاول مرة بعد معاش قداه عطشان.
بضحكة برك ...موش ديما البرشا يقظي ولا الكلام يكفي ولا السلام يدفي عندي الضحكة وحدها تززي.
اهو انا مخذيتش في ززوتك غلوة (ضحكة)آما انت بلوة باش تاخو في ززوتي سنين و هلوة.
منكلمكش بفمي و حتى كي تبدى تلمحلي نعمل روحي منفهمش و نتزعبن و نقول ميهمش اما فما اكا الصوت في تركينة من تراكن قلبي يقللي متكذبش ..لذالك هاني نكلم فيك بستيلويا ؛ هاني نكتبلك في جوابات؛نحكيلك على الساعات الي تعدات و انا نستنى في الصباح يجي و نقابلك في اكا المحطة المحنونة و نشبع من فمك بالسكات و من عينيك بالخزرات ...
انا مرا مهبولة منحبش الحكايات ....نحب البدايات، نحب نعيشهم مد و جزر موجات موجات،المحبة عندي منامات،خزرات ، تبسيمات...الحاجات الصغرونات متاع البدايات اصلا فما ابن مالرشفة لولا في القهوة ترد الروح و تنعوش و في الزوح تفوح ....فما احلى و ابنّ مالبدايات ؟؟؟
محاشتيش منك بكلام محدّد خاطر موش لاقي متحكيلي، نروح انا نكتبو على كراس مسطّر و نعدي الليل نحفظ فيه و نرتّل تقول طفل صغير يحفط في محفوظاتو و يجوّد ...نحب كلام مفرّت و نلمو انا بخيالي المسيّب .
كالعادة بديت نكتب و منيش لاقية وين ناقف ومفماش عينة من ستيلويا الفالح و كالعادة العقارب تجرى العدوة و انا قلبي معلق بالبارح .
و توا سامحني لازمني نقوم نرقد باش غدوة كيف تجهرني ضحكتك و تعنقني خزرتك نلقى باش نقاومك.
هبة الدحداح

الثنية

و قعدت سنين خايفة مالرخ مخيبو احساس قداه تمنيت من ربي يوهبني من اكا آلقوة الي تهد الجبال حتى انك في احن الاوقات مترخش ...قداه قعدت على صوابعي متأهبة و الخوف معبيلي عروقي مترقبة متوجسة و نتخيل بيني و بين روحي ينهارت الي نقابلك منعرش وين باش نكون بروحي؛ نتصور قلبي باش يطرشق في صدري و الدم الي في بدني لكل باش يتلم في عروق وجهي اما نعرف باش نعض على قلبي و نحط عليه حجرتين صوان نثبتو و نبلع الكلام و السلام و مرارة الايام و نعمل روحي منعرفكش و نتعدي الكتف في الكتف و منعبركش و نجري للدار نحل القجر و نجبد حكة الكلام الي عمري مقلتهولك و تخبي فيه الي كنت باش نحكيهولك و ندور عليه بالمفتاح و ندفنو في القجر و نروح .

نتمنى نرجع لنهارت الي بدينا و نبدل الثنية وين تلاقينا و نرجعك غريب في تركينة؛ نخزرلك من بعيد لبعيد في المدينة و نقول يالندرى برى في الدوَر ولا كيفي يرى في الدنيا مستطيلة.

منحطش نقطة اما نرجع للسطر...نرجع وين مبدينا و نفسخ الاربعة من الوقت متاع العشية و نحلف الف يمين و نخلص الف ديّة باش لا نكون ليك لا تكون لياّ و لا يعيش قلبي ضحيّة .

يقولو العشقات الكبار يوفو ميخلفو كان السهاد...كي لانار متخلف كان الرماد ، قعدت قداه وين باش نكون بيك تكبر فيا بالرغم البعاد ، تفرعن فيا و تتمكن بيا قاعد على قلبي كل دقيقة نقول معادش نزيد بيك دقيقة في وسطي اما في نفس الوقت نحب نولي مرا عاقر و لا نولدك لا يجبدك حد مني تزيد تكبر و تفرعن و تتمكن بيا.

عشت قداه بيك فيا لين نهارت الي جبدت عروقك مني عرفت وقتها قداه توغلت فيا و جذورك تشعبت في صدري و ايديا و خزراتك مرشقة في ضلوعي و عينيا مكنتش نعرف قداه تغرست فيا لساعة ممشيت عليا و قعدت نلحس في جروحي و نحرق فيهم بدموع عينيا و نتحاشي فيك و نبدل في الثنية باش متزيدش عليا لحد ما وصلت وليت انا نعبي بالملخ جروحي و نعصر القارص في عينيا و نتمشى في هاكي الثنية و نشم نوار عشية و نعبي بالنَسوة في جواجيا و نقول قداه باش نقعد غشيرة تفرحني البسمة و تقتلني التكشيرة

بالشوية بالشوية شعري تبدل معادش اكحل كلياليا و معادش قصير حد اكتافي و قهوتي معادش حلوة كالعسل و معادش نمشي تحت المطر بلاش سحابة . لذالك و انت تتمشي من بعيد توا قدامي تتدرجح في الثنية قصدتك و لبست صباط الامس و مشيتلك منغير قلب و قلت يالا نتعدى بجنبك و نحط عينيك في عينيا و نشوف اش باش يتبدل فيا حبتو امتحان ليا نشوف بعد هآلسنين اش باش يصير في جواجيا .

الي يوجع اكثر من رد الفعل الي ديما تخيلتو الي ما تحرك شي فيا و الي حسبتك الضلع المايل فوق قلبي والي مشعل النار في رواريا مبقى منك شي كان التصاور الي كانت تسهد لياليا ..بالعمل قلت هذا الي قريب نفنى في جرتو ناري عليك و عليا

ناري على ايامي و لياليا نارى علي دموع عينيا و العمر الي نقضتو ك بالنهار بالنهار جرتك كي اوراق اليومية .

و تعديت جنبك و معقلتنيش و عرفت الي احنا دفنا كل شي ف يالبلاصة هاكي و معاد شي فيك و فيا و قتلك استنى ترجعك غريب و نبدل مرة اخرى الثنية. هبة الدحداح

شوف يا بنت الناس انا لا ندبر عليك لا نقلك عرّس على خاطر كذا لا متعرسش على خاطر كذا ...انت كبيرة و تفهم ماناقصك شي برا اعمل الحاجة الي تراها صحيحة برا اعمل الشي الي يفرحك كانو غالط ولا صحيح في اخر حلقة لكلنا بشر و خطّائين الكمال لله.
الغالط يتصلح و الخايب و حتى الباهي عندو تاريخ صلاحية ...الفكرة كئيبة ياسر اما لا نقول الواقع الردئ ولا الظروف الزبالة ولا الطبيعة البشرية الهوبسية ولا الدلاع ولا الرمان هيا الاسباب الحقيقية انما هاكي سنة الخالق في خلقو ميدوم حال.
و برا عرست للاسباب الغالطة...صححها ! و هاك عرست للاسباب الصحيحة شد صحيح و مشي امورك الدنيا لكلها دودانات و حفر و كل الى فات حمادة و كل إلي جاي حمادة تاني خالص.
و برا راك معرستش اش باش ينقص فيك تره و برا راك ضفرت الشيب حذا داركم مهيش نهاية العالم راو . انا  نعرفو اكا الشعور متاع وين تحل تطلعلك مقال متاع وحدة لقات شكون في حياتها ولد حلال مفرحها  و مفرحاتو تقوم تتشدق و تكتبلك و تبدى تستعرض عليك في عضلاتها و عرس و فلفس و زمر باش درا شنوة نحب نقلهم الناس هاذم تي برو روحو ! كل عنزة معلقة من عرقوبها يا اخي و اي انا ناغرة منكم برو شيخو يالا!
"عرس على خاطر المحبة موش الفلوس" فما ناس ميهمهاش في امو الحب ، تنجم تعيش عمرها الكل ميعرفوشي ميعرفوش منين يقبلولو اصلآ و يسمو بيه حاجات اخرين و مشاعر اخرى  ، ينجمو يعدو العمر لكلو و ميموتوش حتى مرة بالحب اما تحب تعيش في مركز معين و شافت الي هاكي اسهل طريقة بصحتها تو تتحمل مسؤلية إختيارها.
"عرس للحب موش خاطر خايفة يفوتك التران" تي هاو انتو الي ترسخو في فكرة التران توا شكون يحكي في الغلط .خايفة تقعد وحدك بعد منام عين والديك ، تحب تتلهى بحد ، تحددلو سوريتو الصباح و تعملو قهوتو و تتعارك معاه لنص الليل على شعرة في ضهر الفيست متاعو و مجاش ام الحب باش تعرس و لقيت الاسباب هذي كافية برا عرس. الاسباب في عينين ناسها واجبة .متعديش العمر عقد خايفة مالغلط و شايفة انك تحب اكا الحاجة جرب منقلكش لا.
كتبت خاطر تعبت انا من كل شوية يهبطلي مقال عرس على خاطر تحبو موش خاطر عينيه زرق،خوذها خاطر الحب و ليس الجغرافيا ، كرفس زمر تي دبر على بابا عاد . ما سألك حد على رايك و الي يسألك بربي قلو بينك و بينو الناس موش ناقصة فلسفتك الحياتية الاصفاد الي مثقلتنا تكفينا و تزيد.و كانك خايف علينا مالوجيعة نحب نقلك ... وجيعة ماذا ايها الابله!احنا نسا من بلار معجونات بالرمل  اكثر حاجة ممكن تصير نتخبشو اما مانتكسروش.
هبة الدحداح